ولكن هي ما تاقتش بعينيها بقات غادا حتى قربات وقاست القارب وعاد تأكدات بأنه ديال بصح وسط القارب الصغير لقات واحد قنينة ديال ليصانص وهداك القارب كان فيه محرك كان ممكن تمشي بيه ولكن قررات ما تاخذوش لأنها ڭالت من بعد داك القارب ما كانش ديالها وما بغاتش تاخذو لشي حد وتخليه تما ملي خذات ديك القنينة ديال ليصانص طلعات مع واحد الطريق كان باين كيدوز
بنادم من تم حتى لقات واحد الدار بالخشب طلات فالدار ما لقات حتى واحد تما ڭلسات فالظل وتفكرات واحد القضية كان دارها الأب ديالها شحال هادي لواحد الكلب عندهم كان حتى هو تجرح والجرحة ديالو تعفنات بالدود الحل هو تكب ليصانص على ديك الجرحة زيرات على راسها وڭلسات وكبات ليصانص وحسات بواحد الحريق ما كاينش وديك الساعة بدا داك الدود كيحاول يخرج وكاين لي تيحاول يدخل وبديك الطريقة تهنات من 30 دودة وباقي داك الدود لداخل ولكن الجرحة بدات كتعقم وهاد القضية غادي تعاونها باش ديك اليد ما تمشيش ليها، من بعد داكشي حاولات تنعس فوسط ديك الدار حيت كانت مفتوحة ولكن جاتها الأرض قاصحة ولفات تنعس فوق الربيع فالغابة ديك الساعة خرجات وهبطات حتى قربات للواد ونعسات، لغد ليه منين فاقت ڭالت اجي نعاود نرجع نشوف واش جا شي واحد لديك الدار وهي طالعة تلاقات مع 3 ديال الرجال تما، دوك الرجال تصدمو (الهنود الحمر دوك السكان الأصليين ديال ديك البلاصة) بانت ليهم كائن غريب عليهم حيت ديك البلاصة كانت معروفة بالتقاليد ديالها بأنه كاين شي كائن غريب كيخرج من الواد شافو لون عينيها زرق وشعرها أشقر ما فهمو حتى شي حاجة تخلعو ولكن لحسن الحظ كانت كتهظر باللغة الإسبانية لأنها مدة طويلة وهي عايشة فدولة البيرو شرحت ليهم الوضعية ديالها تما فهمو وعطاوها الماء والماكلة وركبوها فداك القارب ومشاو تقريبا 7 ساعات باش يقربو لأقرب مستشفى، مع دخلات للمستشفى لي صغير وفأقرب مدينة للحضارة تما بحالا الجسم ديالها بدا تيڭول ليها أنا درت خدمتي بقيت مقاوم حتى لهاد اللحظة ولكن هنا صافي ساليت بدات تتحس اخيرا بالحريق من بعد 10 أيام عاد حسات بداك الحريق لي مجهد بزاف ومن موراها مباشرة سخفات، فداك المستشفى جات هليكوبتر هزاتها داتها لواحد مستشفى كبير كاين فالعاصمة " ليما " لي تما كان تيتسناها الأب ديالها، وتما دارو ليها الإسعافات وبقات تما ناعسة حتى ولات شويا وتما فين ڭالو ليها بلي أن الطيارة لي جات فيها ولي طاحت منها هي لي كانت الناجية الوحيدة فيها وبأن كلشي لي فديك الطيارة مات داك النهار وحتى الأم ديالها كانت ماتت، كاين واحد الحاجة كنت ڭلت ليكم تعقلو عليها فالأول ديال هاد القصة هي : داك الشخص لي لغاو ليه التذكرة ديالو ومامشاش بطبيعة الحال هاد الشخص ما ماتش ولكن شكون هو ؟!! .
سميتو ڤيرنير وهو مخرج ديال الأفلام ومن بعد ما شاف هاد القصة هادي وشاف هاد السيدة لي تعتقات وأنه كان غادي يركب فديك الطيارة وفآخر لحظة لغاو ليه التذكرة يعني كان غادي يطلع يموت فديك الطيارة، عجباتو القصة وعجبو هادشي كامل وقرر يدير فيلم ووثائقي على هاد القصة كاملة لي وقعات ومشا هو وجوليان لبلايص منين دازت وسط ديك الغابة وعاودت داكشي لي طرا ليها وتلاقاو مع الناس لي عندهم علاقة بالقصة وخرج واحد الفلم وثائقي سماه wings of hope.
محتوى جميل ...شكرا
شكرا لمرورك ❤️